O blogmillo nos bares

Chssst!

(Que as paredes
teñen blog)

Parábola

O amo da Terra
quixo zarrala cun muro

ficou dentro

Protagonista da miña vida

Tanto pasado e tan pouco
futuro para por fin dar
estado
. . . . . . . presente

Lírica

Pódeche gustar unha cántiga
a primeira vez que a escoitas?

Cun poema pasa o mesmo

Es ti

Ti es a tal pra min
Quero sermos

Ámonos

Para non fodela

Podemos follar a vida
pero tamén cómpre que lle

fagamos un chisco o amor

A aldea máis grande de Europa

Ao entrar pola autoestrada
Santiago é unha metrópole

de tella

Talkin' 'bout my generation

Os faladoiros do s. XXI
non son no Derby
son nas portas dos baños do Maycar

O país do circunloquio

Cantamos cumbias
para falarmos por fin

con seseo